Dunyo bo‘ylab millionlab insonlar har kuni ertalabni xushbo‘y latte yoki yoqimli kapuchino bilan boshlaydi. Biroq ko‘pchilik shunchaki odatga aylangan ushbu ichimlik sog‘liq uchun foydalimi yoki xavflimi – degan savolni o‘ziga beravermaydi. Keling, bu masalani biroz chuqurroq o‘rganamiz.
Kalsiy va qahva: ular bir-biriga mos keladimi?
Kofe tarkibida uchraydigan tanin moddalari organizm uchun muhim bo‘lgan kalsiy moddasining so‘rilish jarayoniga ta’sir ko‘rsatishi mumkin. Ya’ni, sutli qahva ichilganda kalsiy organizm tomonidan to‘liq o‘zlashmasligi ehtimoldan xoli emas.
Biroq bu – qahva kalsiyni butunlay “yo‘qotadi” degani emas. Aslida kalsiy sutdagina emas. Qattiq pishloqlar, sardina, fasol va ko‘katlar ham uning boy manbai hisoblanadi. Agar kundalik ovqatlanish ratsioningiz xilma-xil va muvozanatli bo‘lsa, sutli qahvadan kelishi mumkin bo‘lgan kalsiy yo‘qotishini osonlikcha qoplash mumkin.
Har narsada bo‘lgani kabi — eng muhimi me’yor
Sog‘lom organizm yetarli miqdorda kalsiyni qabul qila oladi. Kofe iste’molida me’yorga rioya qilinsa, undan voz kechish shart emas. Kun davomida 3–4 finjongacha sutli qahva ichish organizmiga zarar yetkazmaydi.
Kimlar ehtiyot bo‘lishi lozim?
Agar sizda kalsiy yetishmovchiligi yoki hazm tizimida muammolar bo‘lsa, hamda agar homilador bo‘lsangiz — sutli qahvani muntazam iste’mol qilishdan avval shifokor maslahatini olishingiz tavsiya etiladi.
Sutli qahvani sog‘lom odatga aylantirish mumkinmi?
Albatta! Quyidagi maslahatlarga amal qilishni unutmang:
- Shakar qo‘shmang. Shakar faqat kaloriya manbai xolos. Steviya, eritrit yoki tabiiy qahva ta’mi bilan qoniqishga harakat qiling.
- Qahvani ertalab yoki kunning birinchi yarmida iching. Bu uyqusizlikdan saqlanish va tetiklikni ta’minlashga yordam beradi.
- Sifatli sut tanlang. Organik yoki o‘rta yog‘li sutni iste’mol qilish foydali bo‘ladi.
- Ovqatdan keyin iching. Bu qahva ta’sirini yumshatadi va hazm tizimiga ortiqcha yuk tushirmaydi.
- Turli ichimliklar bilan almashtirib turing. Suv, giyohvand choylar, mevali nastoylar ham kundalik ratsionada bo‘lishi kerak.
Sutli qahva zararli emas. Agar sog‘lom turmush tarziga amal qilsangiz va to‘g‘ri ovqatlansangiz — bu sevimli ichimlik hayotingizning bir qismi bo‘lishi mumkin. Eng muhimi, me’yorni biling va tinglay biling – organizmingizni!
