Haval kompaniyasi Rossiya bozori uchun yangi avlod F7x krossoverining narxlari va jihozlari haqidagi ma’lumotlarni e’lon qildi. Mashhur model 2025 yilning ikkinchi choragidan boshlab sotuvga chiqadi va ikki xil jihozlanish darajasida xaridorlarga taqdim etiladi.
Yangi Haval F7x krossoverining Premium versiyasi 3 499 000 rubl, yanada ilg‘or imkoniyatlarga ega bo‘lgan Tech Plus versiyasi esa 3 699 000 rubldan sotiladi.
Har ikki versiya ham kompaniyaning innovatsion L.E.M.O.N. texnologik platformasi asosida qurilgan bo‘lib, haydovchiga avtomobilni to‘liq nazorat qilish imkonini taqdim etadi. Yangi model quvvati 192 ot kuchiga ega bo‘lgan, 2,0 litrli benzinli turbo dvigatel hamda 7 pog‘onali ikki muftali robotlashtirilgan uzatmalar qutisi bilan jihozlangan.
Avtomobilning to‘liq g‘ildirakli tizimi zamonaviy elektro-gidravlik mufta orqali ishlaydi va yo‘l sharoitlariga qarab tanlash mumkin bo‘lgan oltita rejimni o‘z ichiga oladi. Ularning ichida “qor”, “qum”, “yo‘ldan tashqari” kabi maxsus rejimlar mavjud. Bundan tashqari, old tomonda McPherson hamda orqa tomonda ko‘p liniyali osma tizimi yuqori darajadagi qulaylik va boshqaruvchanlikni ta’minlaydi.
Ichki jihozlar ham yuqori texnologiyalarning so‘nggi yutuqlari bilan boyitilgan. Salonda 12,3 dyuymli raqamli priborlar paneli va 14,6 dyuymlik sensorli multimedia displey o‘rnatilgan. Multimedia tizimida smartfonlar bilan simsiz ulanish imkoniyati, shuningdek, Rossiyada mashhur bo‘lgan «Yandeks Avto» platformasi bilan integratsiya mavjud.
Bundan tashqari, Haval Connection tizimi orqali avtomobilni mobil ilova yordamida masofadan boshqarish mumkin. Bu ilova dvigatelni masofadan turib ishga tushirish, eshiklarni qulflash va ochish, isitish tizimlarini yoqish, iqlim nazorati hamda avtomobil geolokatsiyasini kuzatish kabi qulay funksiyalarni taqdim etadi.
Xaridorlarga kuzov uchun to‘rtta rang taklif etiladi: "Galaktik qora", "Okeanik lazurit", "Olijanob agat" va "Tutunli marvarid". Salon esa faqat bitta – qora rangda bo‘ladi.
Yangi Haval F7x krossoverlari Rossiyaning 96 ta shahrida joylashgan 158 ta Haval City dilerlik markazlari orqali sotiladi. Mazkur avtomobil to‘liq sikl asosida Tula viloyatidagi zavodda ishlab chiqariladi.
